السبت، 9 يونيو، 2012

سمعه الهتــــــــــــــــــــــاف فى ودني ..!!

فى الاول انا واحده من البنات اللى كانت فى الوقفه بتاعت (لا للتحرش)  ... 
عايزه احكى على اليوم من الاول ... 
يمكن اخرج الطاقه السلبيه اللى عندى 
يمكن .....


اليوم كان حلو اوى من البدايه
 او انا كنت رايحه وانا عايزه اليوم يبقى حلو
 عايزه اطلع الغضب اللى عندى من موضوع التحرش ..


انا كتبت قبل كده عن مشكلتى عن التحرش و كنت فاكره انى مش هكتب تانى بس واضح ان الموضوع مش سهل ومش هينتهى غير بحرب ايوه حـــــــــــــــرب ! 


المهم اخدت يفطه مكتوب عليها ...
(الى الستات : طالب بحقك وتكلمى لو حد اتحرش بيكى .. الى الرجاله : بصوا للستات على انهم بنى ادمين مش مجرد اجسام ) 
وقفت فى صمت تام اسمع تعلقات الناس السخيفه اوقات و المشجعه فى اوقات اخرى.. 
مكنتش مضايقه من التعلقات الوحشه علشان انا عارفه كويس ان مستحيل حاجه الناس تجتمع عليها وبذات فى مصر ! 
بس كان هدفى مش المتحرش 
لانى عارفه كويس ان اكيد المتحرش مش هيستوعب الكلام ده
 لانه مش انسان ولا حتى حيوان !!
كنت عايزه اقول للثوار خد بالك متسكتش على القرف اللى بيحصل وخد موقف .. 
يعنى كان كلامنا مع الرجاله مش الذكور اللى محسوبه على الرجاله اللى بتشوف تحرش وبتسكت !!


عايزه اقوله انت بتعمل جريمة ..
لما بتشوف تحرش وتسكت او تقول وانا مالى 
ده كان هدفى الشخصى
 وبعدين حسيت انى عايزه اصرخ فى الناس و اقولهم احنا بجد مش بنتأزى من التحرش بس
التحرش بيموت جواك الشعور بالامان .. 
قررت انى ههتف بصوت عالى وخرج االطاقه السلبيه اللى عندى ... 
وبدات فى الهتاف بصوت عالى كل كلمه كنت بخرجها من قلبى .. !!


الهتافات ..
بنت جدعه فى الميدان و المتحرش كلب جبان.
المس جسمي كمان وكمان أختك زيى فى يوم تتهان  
مد أيديك على أختك عار الميدان للثوار
التحرش مش بيازينى التحرش بيموتنى 
اهتفى دفعى عن القضيه هو الجانى و انتى الضحية 
جسمى ملكى وحقى كمان مش هسمح فى يوم يتهان 
التحرش مش هيفيدك جرب تانى وانا اقطع ايدك 

وكنا عايزين نبعت رساله لنظام المخلوع  اللى لسه موجود و المجلس العسكرى
 ونقولهم احنا فاهمين انكم عايزين تسؤا سمعة الميدان
 علشان الناس تقول ده بيحصل فى تحرش مش هنروح تانى ..
والبنات تخاف ومتكملش .. 
عايزين نقولهم مهما عاملوا مش هنخاف ومش هنقف وهنكمل وكل مره بتبانوا اكتر من الاول 


 كان فى هتاف مخصوص للكلام ده .. 
ابعت هات متحرشين مش هنطاطى ولا هنلين 
و ابعت هات فى البلطجيه مش هتنسينا القاضيه 
بعد القهر و العذاب مش هنخاف من حبة كلاب 
يسقط يسقط حكم العسكر 


بنات مصر خط احمر !! 


كنت بقول الهتافات وانا اسعد واحده فى الدنيا .. بقول اللى عايزه اوصله للناس .. 


.. قررنا اننا نغير المكان علشان صوتنا يوصل لكل الناس .. اتحركنا و الولاد اللى معانا عملوا علينا كردون
 مع انى كنت حبه نمشى برحتنا فى الميدان .. 
مره واحده واحنا رايحين على ميدان طلعت حرب فى اول الشارع 
فى شخص اتحرش ببنت مش عارفه ازاى طبعا خناقه احنا مش فاهمين ايه اللى بيحصل بس فى صوت صراخ
ابتدى يحصل تجمعات و اللى بيعرف ياخد بنت يتحرش  بيها واللى يتحرش فى النص و يجرى
و اللى يتمسك ويضرب 


واحد صاحبتى 15 واحد اتحرشوا بيها فى نفس الوقت انا مش عارفه ازاى
ومعاها بنت تانيه قلعوها هدمها وكان معاهم والد بيحاول يعمل حاجه اتسرق فلوسه و موبايله ..! 
انا مش عارفه هو ده بيحصل ليه هو احنا مش بنى ادمين !! 
ايه يخلى الموضوع يوصل لكده !!


مشينا مجموعه مع بعض لحد نص شارع طلعت حرب فى حماية الولاد اللى كانوا معانا .. 
كان فى متحرش فى النص بيتحرش بينا واحنا بنفتكروا واحد مننا حولنا نمسكوا طلع يجرى للاسف الولاد كانوا صعب يمسكوا ويسبونا لوحدنا كان ممكن يحصل اكتر من كده .. 


انا عندى حاله من الزهول لحد دلوقتى من اليوم
  وبسأل ليه كل ده ليه حصل فينا كل كده !! 


ده اليوم اللى مش عايزه افتكره بحاول انسى علشان اعرف اكمل حياتى ..
بس انا مش هسكت وهكمل الدفاع ضد التحرش .. 


اللى عايزه اقوله ان التحرش مش فى الميدان بس
 لا التحرش فى كل حته
 فى كل شارع
 فى الميكروباصات 
و فى المترو 


مينفعش نسكت ومينفعش نقول مبررات للموضوع زى 


اصل الولاد عايزه تجوز 
هى البنات كمان معندهاش شهوات وشعور زى الولاد


اصل لبس البنات مش عارفه ايه 
طيب مهو فى منقبات بيحصل معاهم كده 


او فى رأى ولاد للاسف محسوبين على الرجاله  بيقولوا
(فى بنات عايزه كده بتحب التحرش) 
عايزه اقوله يا (حيوان ) مفيش بنت عايزه تحرش مستحيل
 ولو هى واحده مش كويسه برضه مفيش حد بيحب حاجه غصب عنه ..! 
 وعايزه احاول اوصفلكم اد ايه الموضوع بيدمر نفسيت اى بنت مش ممكن تتخيل الوجع و الالم اللى بتحس بي ! 
علشان كده .. 


مفيش مبررات  لجريمة التحرش ..!


انا خلصت اليوم الاسود اللى هيكون 


علامة سوده فى تاريخ مصر ! 


و عايزه اقول لكل البنات  اللى كانوا موجودين ارفعوا راسكو انتوا احسن بنات فى الدنيا علشان بتدفعوا عن قضيه 
و عايزه اقول للاولاد  اللى كانوا معانا وبيحمونا وخايفين علينا انتوا رجاله
وللاسف مفيش كتير منكم فى مصر كملوا معانا فى الدفاع عن القضية .. 
علشان هى مش قضيه بنات بس دى قضيه مجتمع .. 


حاسه انى عايزه اقول كلام كتير عايزه اخرج كل الطاقه السلبيه اللى عندى 
اه فى حزن داخلى من كل اللى حصل ومن اللى بشوفه كل يوم فى شوارع مصر ..! 


و كان نفسى ارجع البيت وانا مبسوطه انى هتفت بصوت عالى و طلعت الطاقه السلبيه ..! 


بس الطاقه السلبيه مش هتخرج بالكلام هتخرج بالفعل
لانى مش هسكت ومش هخاف من النهارده .. 


وبجد لحد دلوقتى 



سمعه الهتاف فى ودنى ..! 


















الثلاثاء، 5 يونيو، 2012

موسيقى بعد الحزن ...


                                 الراجل ده اثر فيا اوى =)) 




                                      و الست دى كمان ..! 






مفتقـــــــــــــــدة حاجات

مفتقده حاجات .. و مفتقده نــــــــــــــــــــــــــــــــاس !!



مفتفده حضن ناس كتير فى اوقات كتير .. 

مفتقدة الــــــدلع بتاع زمان من اخواتى !
مفتقدة نفسى وانا صغيره ! 
مفتقدة جدتى وحضنها ودلعها ليا وضحكتها الحلوه ..! 
مفتقدة ايناس  وانا بكلمها اكنى بكلم نفسى و اعيط  وهى تعيط معايا !
مفتقدة العب فى الشارع مع ايناس وامل ! 
مفتقدة اخويا لما كان اخويا بجد .. لما كان بيوحشنى ! 
ومفتقدة وقفة العيد فى بيت ايناس .! 
مفتقدة محـــــــــــــمود صديقى ! 
مفتقدة يسرا وبيت يسرا و المكرونه اللى كنا بنعملها مع بعض !
مفتقدة منى اختى مع انها موجوده بس مفتقدها وهى معايا فى الحياه  ..! 
مفتقدة الاحساس بالنجاح ! 
مفتقدة لعبة الباسكت اللى كنت بنسى العالم وانا بلعبها .. !
مفتقدة الجرى فى الشارع ! 
مفتقدة السلام بين الناس !
مفتقدة الامان ..! 
مفتقدة الضحك بصوت عالى مع ناس بحبهم !
مفتقدة حاجات البنات و المرقعه ! 
مفتقدة الخروجات اللى ملهاش لازمه وكلام البنات ..!
مفتقدة احضر فرح  حد بحبه و ارقص و اطلع كل الطاقه ! 
مفتقدة انى احب حد و احلم بى ! 

مفتقدة الحياه الطبيعية ..! 




مفتقده نفــــــــــسى وانا ..

مبسوطه .. مرتاحه !!