الاثنين، 29 أغسطس، 2016

اكتشاف ملهوش لازمه

اكتشفت ان مش كل حاجة حاسس ان وجودك مهم فيها بيكون مهم
ممكن تكون مش شايف من عندك كويس او محتاج تهرب شوية بعيد عن الدوشة
في ناس كان وجودها مهم ولما مبقتش موجودة الحياه مشيت وانا مشيت
كل حاجه بتستمر من غيرك او بيك ممكن تكون بتتأثر بعدم وجودك بس بتمشي
فكر في نفسك لوحدك قبل ما تبقي موجود علشان تعرف تبقي موجود بجد
انا مشيت كتير ولسه بمشي وهمشي وفي ناس بتمشي وناس هتمشي وهننسي وهنفتكر  وهنتأثر وهنأثر وهنفرح وهنعيط وهنعيد ونعيد ونعيد ونعيد

الاثنين، 25 يوليو، 2016

أنا حاسة


ساعات بحس اني خايفة وساعات بحس اني عادي

اول مره في حياتي احس اني عايزه اكل تفاح
وحاسة اني ممكن اتفرج علي لميس الحديدي علشان اوش دماغي شوية
حاسة اني ممكن اقوم اعمل عصير ليمون باللبن
حاسه اني ممكن انزل اقعد مع الكلب في الشارع مع انه بقي شرير من كتر شر الناس اللي في المكان
حاسه اني ممكن اتكلم في الحاجات اللي كانت موتراني الفتره اللي فاتت
حاسه اني ممكن اكل بلح باللبن واجرب القلقاس لاول مره وممكن كمان اجرب البصاره
وحاسة اني ممكن اكتب زي زمان كتير
وحاسة اني ممكن اجري في الشارع واللي يكلمني اتخانق معه
حاسة كمان اني ممكن اخد حقي من اي حد
بس مش حاسة اني مفروض اعمل حاجة غصب عني ولا استمر في حاجه وانا مضغوطة ولا حاسه اني مفروض اتعامل مع ناس وحشه بتضايق الكلاب او بتضايقني
ولا حاسه اني مفروض اكون خايفه طول الوقت علي نفسي
انا بحب نفسي وعايزه اكون مرتاحة بس



السبت، 19 سبتمبر، 2015

سر


المزيكا مهمه بس مش اهم من وجود الناس اللي بيسمعوها معاك 
بس فى النهاية اللى بيبقي المزيكا وشوية الذكريات اللى بتربط المزيكا بالاشخاص 
اسمعوا مزيكا مع الناس اللى بتحبوها علشان تشموا نفس الريحه وتفتكروا  نفس التفاصيل 
كل لحظه حلوه اربطوها باغنية في الاول لما تفتقدوا الشخص هتتوجعوا لما تسمعوها
 لكن بعد كده هتحس ان اهم لحظه انك قررت تشارك بيها الشخص اللى بتحبه 
علشان يفضل موجود معاك 

 شكراً للشاب خالد على اغاني كتير بتفكرني بــ ناس بحبها مش موجودة 
 وشكراً لام كلثوم اللي دايماً بتخليني اشوف ابويا جنبي 



الأحد، 12 أبريل، 2015

اكتشافات


انا الايام دي بكشتف حاجات جديدة 
جديده عليه مش علي حد او هتكون جديدة على حد ولسه هيكتشفها 
بكتشف حاجات فيا وانا مش عارفها ومش عارفة اسيطر عليها 

اكتشفت مثلا ان اللى بيموت مش هيرجع تاني 
واكتشفت انك ممكن تعمل حاجة انت مش عايز تعملها 
واكتشفت اني مهمله فى حق نفسي 
واكتشفت اني لوحدي جداً 
واكتشفت اني فعلاً مبسوطة بحاجات مش موجودة 
واكتشفت اني بخاف من حاجات محدش لي دعوه بيها 
واكتشفت اني مش بحب حد يقولي متخافيش 
واكتشفت اني مش بحب اكون ضعيفة 
واكتشفت اني مش دايماً قوية زي ما انا عايزة 
واكتشفت اني قوية وعندي تحكم فى حياتي 
واكتشفت اني بحب ماما جداً 
واكتشفت اني مش عايزه اعيش لوحدي ابداً 
واكتشفت اني مش زي ما انا عايزه نفسي فى مواقف كتيرة 
واكتشفت اني ابعد واحده لاي حاجة قريبة 
واكتشفت اني عبيطه فى مواقف كتير 
واكتشفت اني بسكت كتير والمفروض اني اتكلم 
واكتشفت اني مستحيل اعيش زي ما اي حد عايزني اعيش 
واكتشفت اني بهرب بكل سهولة 
واكشفت اني رخمة جداً 
واكتشفت اني ممكن اسمع فريد الاطرش واتبسط 
واكتشفت اني مبسوطة اني بنت وان ده الاختيار الانسب ليا 
واكتشفت اني لما بكدب بتعب وبكتئب 
واكتشفت اني ممكن اكل سمك مع اني بحبهم وهما اصحابي فى الماضي والحاضر 
واكتشفت اني ممكن العب مع القطط عادي 
واكتشفت ان الكلاب كائن اعظم من الانسان 
واكتشفت الناس اللى بتربي العصافير ناس معندهاش دم 
واكتشفت اني ممكن ارقص واتمرجح واتبسط لوحدي 
واكتشفت اني مش لازم احب الناس اللى بحبهم على طول 
واكتشفت اني عمري ما كرهت حد غير الناس اللى بحبها 



السبت، 21 فبراير، 2015

الموت سفر


إزيك يا بابا وحشتني اوي نفسي أشوفك زي زمان واقعد معاك
وحشتني لدرجة إني حاسة اني تايهة 

فات على بُعدك عني 8 شهور و26 يوم 

 بدور عليك بس عارفة انك مش موجود
 الحياه وحشه من غيرك والاحساس بالخوف بيزيد على الناس اللى حواليا ليسبوني زيك 
حاجة كويسة انك مش موجود في الحاجات الوحشة اللى بتحصل في الحياه
وحاجة حزينة انك مش موجود معايا في البيت بتاعنا 
بشوفك في الاحلام بتنقذني دايماً 
بشوفك بستريح احلام مريحة 
نفسي انام على طول وتفضل معايا فى الحلم 
اوعي تبعد عني اكتر من كده خليك جنبي حتي لو مجرد حلم 
خايفة الموت يكون بينسي وتنساني 
اوعي تنساني يا بابا الموت غريب بنسبالي مش قدره اتصالح معه 
ولسه بفكر كتير انت عايش ازاي او مش عايش ازاي من غيري مش عارفة انت فين 

مستنيه اليوم اللى ممكن اجيلك في بس خايفة يكون كل واحد لوحده ومش هشوفك 

الموت بنسبالي سفر ليك ...بحبك 

الثلاثاء، 23 سبتمبر، 2014

إلي ما لا نهاية



مكنتش اعرف  يعني ايه إفتقاد 
كل ما بابا يوحشني احس ان فى سكينه بتخرم قلبي 
الافتقاد وجعني 
كل ما اكل حاجة بيحبها واقول اسيب لبابا يجي عقلي الواعي يفوقني احس ان جسمي إصفر 
كل ما اكون عايزه اكلمه اتوجع 
كل ما اكون عايزه اسمع صوته اتوجع 
اوقات بوصل لمرحلة اني عايزه اشوف بابا وخلاص 
قدره استوعب الواقع وفي نفس الوقت مش قدره استوعب ولا اتنفس 

بتبسط لما اشوف راجل شبه بابا من ضهره 
او ايد شبه ايد بابا ببقي عايزه ابوسها وبعدين افوق واحس اني اصفريت من جوه 
احساس بالوجع بعيش فى ايام كتير مع نفسي مش عارفة افهم 
عياط وانهيار وفجأة بحس ان مفيش حاجة ليها معني الحزن فى القلب واسكت 
كل حاجة بقت حواليا ملهاش معني
 مفيش حاجة بتزعلني كل ما اضايق من حاجة ارجع اقول لا الحزن ده مختلف كويس انى مش حزينه دلوقتي
ويحصلي حاله من الامبالاة واسكت 
بابا وحشني بشكل مخليني مش عارفة اتنفس 

انا فعلا نفسي امشي من الحياه او من البلد علشان مكنش فى الشقه اللى كان فيها بابا معايا 
مستناش ينديلي بالليل 
ولا لما  اجي اكل حاجة افتكر انه بيحبها 
فعلا مش عايزه افتكر حاجة 
ياريت افقد الذاكره وانسي واعيش من جديد وخلاص 
بس برضة عايزه افتكر ان كان عندي اب حلو
 مش عارفة اعمل ايه بصراحة 
بس عادي الحاله بتيجي وتروح وارجع اتعايش وارجع افتكر وارجع اتعايش وهكذا... الى ما لا نهاية 



السبت، 6 سبتمبر، 2014

الغيوم مانعة الرؤية

إلي من يهمه الامر 

مفيش صديق معين ممكن ارسل له  الرسالة  
انا بمر بمرحلة مختلفة مفهاش اختلاف غير تغيرات داخليه 

صوت عياطي بيخوفني مش بعرف اكتم صوتي 
افتقادي كسرني 
قلبي وجعني لما بدور عليه 
انا تعبانة رغم صوت ضحكي اللي بيعلي احياناً 
بعمل كل حاجة علشان اغيم على افكاري 

انا هنا بس مش عارفة اقف جنبي 
ومش عارفة محتاجة ادعم نفسي ازاي 
الحب بيقل جوايا تجاة كل الاشخاص والاشياء 
ببعد عن المكان اللى فى المكان الخاص بيا 
مش عارفة اتواصل  
كل التواصل انتهي مفيش إشارات توصلني 

محتاجة توقف جنبي وتساعدني لاني مش عايزه ولا عارفة اتعايش 
اخترت اغيب عن الوعي علشان ابعد عن التفكير
 واكتشفت انها بتقربني اكتر من كل الافكار 


الغيوم مانعة الرؤية