الاثنين، 7 يوليو، 2014

رسالة إلي ربنا

ازيك يا رب كويس؟
 اكيد كويس
 انا مش كويسة 
انت اخدت مني حاجة بحبها اخدت مني اعظم حد فى حياتي
 وانا عجزه عن اى تعبير ممكن يتقال 
انا بحب ابويا يا رب بحبه وعايزاه معايا ومش عارفة اعمل ايه 
طيب فاكر لما قولتلك ودعيتك من قلبي اني اموت قبله 
طيب انا مش شايفة حاجة دلوقتي غير اني عايزه بابا 
كان نفسي اكون طفله مش فاهمه يعني ايه فراق 
 مش عارفة يعني ايه مش هشوف حد تاني 
مش عارفة يعني ايه مش هلمس حد تاني 
مش هترمي فى حضنه تاني 
طيب يا رب ممكن اعترض وتسامحني
انا بحبك لاني بحس انك جنبي فى حياتي وبتساعدني 
بس انا عايزه بابا برضة 
الواقع بابا مش موجود 
والبيت فاضي ووحش 
الكرسي بتاعه فاضي 
الكنبه اللى كان بينام عليها وهو تعبان فاضية 
السرير بتاعه فاضي 
عارف المشكلة ان الدنيا مش بتوقف وبتستمر 
وانا لسه عايشة
 لسه موجوده وانا نفسي اتبخر ومحاسش بأي حاجة 
طيب مش هسمع صوته تاني
  ازاي ارجوك فهمني 
صوته مهم فى حياتي وهو بينادي عليه ويقولي تعالي لو خايفة تنامي لوحدي 
طيب لما النور بيقطع وهو عارف انى بخاف من الضلمه يقولي بصوت عالي 
 تعالي انا هنا فى الاوضة متخافيش 
مين هيصحيني من النوم وانا رايحه الشغل يقولي قومي روحي المدرسة 
هو كان مقتنع اني لسه صغيره وبروح المدرسة مش الشغل 
طيب هعمل ايه فى الذكريات دي 
طيب هتكلم مع مين فى الذكريات وزمان والحاجات الحلوه اللى كانت زمان 
مين هيكلمني فى التليفون انا كنت دايماً رخمه معاك فى التليفون 
ممكن تخلي يسامحني على اني كنت برخم عليه في التليفون 
ليه يا رب الحياه قاسيه كده ليه امسك ايد بابا وهو مش ماسك فى ايدي 
وقبلها بكام ساعه كان هو اللى ماسك ايدي وبيدوس عليها من التعب 
كنت حاسه ان فى ايام وحشه هتيجي بس مكنتش عايزه اليوم ده يعدي عليه وانا عايشة 
ذكريات هموت بيها 
قلبي وجعني اوي يا رب كل ما اشوف البيت من غيره 
ممكن اطلب طلب منك 
ممكن بابا ميكونش لوحده ويكون قاعد مع جدتي وتاخد بالها منه 
هي اكتر واحده انا ممكن اطمن وهو معاها 
او ينفع الزمن يرجع اسبوع واحد بس 
ارجوك ارحمني 
وحاول متزعلش مني 

شكراً يا رب