الثلاثاء، 23 سبتمبر، 2014

إلي ما لا نهاية



مكنتش اعرف  يعني ايه إفتقاد 
كل ما بابا يوحشني احس ان فى سكينه بتخرم قلبي 
الافتقاد وجعني 
كل ما اكل حاجة بيحبها واقول اسيب لبابا يجي عقلي الواعي يفوقني احس ان جسمي إصفر 
كل ما اكون عايزه اكلمه اتوجع 
كل ما اكون عايزه اسمع صوته اتوجع 
اوقات بوصل لمرحلة اني عايزه اشوف بابا وخلاص 
قدره استوعب الواقع وفي نفس الوقت مش قدره استوعب ولا اتنفس 

بتبسط لما اشوف راجل شبه بابا من ضهره 
او ايد شبه ايد بابا ببقي عايزه ابوسها وبعدين افوق واحس اني اصفريت من جوه 
احساس بالوجع بعيش فى ايام كتير مع نفسي مش عارفة افهم 
عياط وانهيار وفجأة بحس ان مفيش حاجة ليها معني الحزن فى القلب واسكت 
كل حاجة بقت حواليا ملهاش معني
 مفيش حاجة بتزعلني كل ما اضايق من حاجة ارجع اقول لا الحزن ده مختلف كويس انى مش حزينه دلوقتي
ويحصلي حاله من الامبالاة واسكت 
بابا وحشني بشكل مخليني مش عارفة اتنفس 

انا فعلا نفسي امشي من الحياه او من البلد علشان مكنش فى الشقه اللى كان فيها بابا معايا 
مستناش ينديلي بالليل 
ولا لما  اجي اكل حاجة افتكر انه بيحبها 
فعلا مش عايزه افتكر حاجة 
ياريت افقد الذاكره وانسي واعيش من جديد وخلاص 
بس برضة عايزه افتكر ان كان عندي اب حلو
 مش عارفة اعمل ايه بصراحة 
بس عادي الحاله بتيجي وتروح وارجع اتعايش وارجع افتكر وارجع اتعايش وهكذا... الى ما لا نهاية 



السبت، 6 سبتمبر، 2014

الغيوم مانعة الرؤية

إلي من يهمه الامر 

مفيش صديق معين ممكن ارسل له  الرسالة  
انا بمر بمرحلة مختلفة مفهاش اختلاف غير تغيرات داخليه 

صوت عياطي بيخوفني مش بعرف اكتم صوتي 
افتقادي كسرني 
قلبي وجعني لما بدور عليه 
انا تعبانة رغم صوت ضحكي اللي بيعلي احياناً 
بعمل كل حاجة علشان اغيم على افكاري 

انا هنا بس مش عارفة اقف جنبي 
ومش عارفة محتاجة ادعم نفسي ازاي 
الحب بيقل جوايا تجاة كل الاشخاص والاشياء 
ببعد عن المكان اللى فى المكان الخاص بيا 
مش عارفة اتواصل  
كل التواصل انتهي مفيش إشارات توصلني 

محتاجة توقف جنبي وتساعدني لاني مش عايزه ولا عارفة اتعايش 
اخترت اغيب عن الوعي علشان ابعد عن التفكير
 واكتشفت انها بتقربني اكتر من كل الافكار 


الغيوم مانعة الرؤية 

السبت، 2 أغسطس، 2014

رسالة إلي بابا

بابا وحشتنــــــــــــــي 

كل حته فى البيت زعلانه انك مش موجود
 كان نفسي تكون مسافر وترجع لكن انا عارفة انك مش هترجع 
بابا كنت عايزاك تكون معايا  على طول 
انا عارفة انك دلوقتي مرتاح بس انا مش مرتاحه 
لو حاسس بيا تعالي حتي فى الحلم احضني 
انا مفتقده الحضن بتاعك
 ضحكتك 
صوتك فى التليفون 
كلمني تاني فى التليفون انشالله حتي تكون معجزه 
او حتي اتخيل انك بتكلمني وانت مش بتكلمني 
بابا وحشتني بجد مش عارفة اجيبك منين او اوصلك ازاى 
انت عارف اني بحبك وانك  اكتر واحد بحبه 
وعارفة انك بتحبني اكتر واحده  
لما كنت بقولك كده كنت بتضحك 

انا اسفة على اى حاجة 
او علي اي يوم زعلت مني في 
انا زعلانه اني  اتولدت اصلاً وعشت الايام دي 
انا مش هنسي اى حاجة او اي ذكري كنا فيها مع بعض 
كل حاجة طعمها وحش لما مشيت 
العسل بتاعك طعمه وحش علشان مش بتاكل منه 
الاكل فى البيت وحش 
العيد كابوس من غيرك 
الكرسي بتاعك زعلان 
كل حاجة زعلانه 
لازم تعرف انك موجود وانت مش موجود 
انا اسفة ان الحياه مستمره وانت مش موجود 


الجمعة، 1 أغسطس، 2014

رسالة إلي الحيطان

كتير بحس انى جوايا هادي وبحس انى راضية بكل اللي حصل
 راضية ان ابويا مش هيكون موجود خالص
 مش هسلم عليه واحضنه تاني
 مش هسمع صوته تاني
 مش هتكلم معاه تاني 
راضية وانا مش راضية 
راضية وخلاص 
ببعد عن البيت اللى طول الوقت مرتبط بوجود بابا 
لان الطبيعي انه لازم يكون موجود لازم ادخل البيت الاقي بابا 
نهزر بقي نتخانق المهم انه موجود 
نسمع ام كلثوم مع بعض 
المهم ان البيت معانا فى كل زكرياتنا مع بعض 
انا دلوقتي بقيت كويسة لكن الحيطان اللى موجوده فى الشقة بتاعتنا زعلانه وبتعيط علشان هو مش موجود انا فعلاً مش عارفة اعملها حاجه غير انى ازعل معاها
 زكريات مكتوبه عليها 23 سنه كل حته فيها مكتوب فيها موقف او يوم حلو او وحش 
الموضوع مش سهل علي الحيطان انا عارفة 
كان نفسي اعرف اعملك حاجة بس للاسف عمري ما شوفت حد مات ورجع تاني 
لما ركزت لاقيت انك فعلا من اكتر الناس اللى كانت موجوده معانا 
انتِ اللى حاسه بيا 
انا اسفه انك لما بتكوني زعلانه بزعل معاكي مش بقف جنبك 
الحيطه وجودها مهم فى حياتي بتكلم معاها وهي بتحكي معايا عن كل التفاصيل اللى مش عارفها 


شكراً لوجود الحيطان فى حياتي 

الاثنين، 7 يوليو، 2014

رسالة إلي ربنا

ازيك يا رب كويس؟
 اكيد كويس
 انا مش كويسة 
انت اخدت مني حاجة بحبها اخدت مني اعظم حد فى حياتي
 وانا عجزه عن اى تعبير ممكن يتقال 
انا بحب ابويا يا رب بحبه وعايزاه معايا ومش عارفة اعمل ايه 
طيب فاكر لما قولتلك ودعيتك من قلبي اني اموت قبله 
طيب انا مش شايفة حاجة دلوقتي غير اني عايزه بابا 
كان نفسي اكون طفله مش فاهمه يعني ايه فراق 
 مش عارفة يعني ايه مش هشوف حد تاني 
مش عارفة يعني ايه مش هلمس حد تاني 
مش هترمي فى حضنه تاني 
طيب يا رب ممكن اعترض وتسامحني
انا بحبك لاني بحس انك جنبي فى حياتي وبتساعدني 
بس انا عايزه بابا برضة 
الواقع بابا مش موجود 
والبيت فاضي ووحش 
الكرسي بتاعه فاضي 
الكنبه اللى كان بينام عليها وهو تعبان فاضية 
السرير بتاعه فاضي 
عارف المشكلة ان الدنيا مش بتوقف وبتستمر 
وانا لسه عايشة
 لسه موجوده وانا نفسي اتبخر ومحاسش بأي حاجة 
طيب مش هسمع صوته تاني
  ازاي ارجوك فهمني 
صوته مهم فى حياتي وهو بينادي عليه ويقولي تعالي لو خايفة تنامي لوحدي 
طيب لما النور بيقطع وهو عارف انى بخاف من الضلمه يقولي بصوت عالي 
 تعالي انا هنا فى الاوضة متخافيش 
مين هيصحيني من النوم وانا رايحه الشغل يقولي قومي روحي المدرسة 
هو كان مقتنع اني لسه صغيره وبروح المدرسة مش الشغل 
طيب هعمل ايه فى الذكريات دي 
طيب هتكلم مع مين فى الذكريات وزمان والحاجات الحلوه اللى كانت زمان 
مين هيكلمني فى التليفون انا كنت دايماً رخمه معاك فى التليفون 
ممكن تخلي يسامحني على اني كنت برخم عليه في التليفون 
ليه يا رب الحياه قاسيه كده ليه امسك ايد بابا وهو مش ماسك فى ايدي 
وقبلها بكام ساعه كان هو اللى ماسك ايدي وبيدوس عليها من التعب 
كنت حاسه ان فى ايام وحشه هتيجي بس مكنتش عايزه اليوم ده يعدي عليه وانا عايشة 
ذكريات هموت بيها 
قلبي وجعني اوي يا رب كل ما اشوف البيت من غيره 
ممكن اطلب طلب منك 
ممكن بابا ميكونش لوحده ويكون قاعد مع جدتي وتاخد بالها منه 
هي اكتر واحده انا ممكن اطمن وهو معاها 
او ينفع الزمن يرجع اسبوع واحد بس 
ارجوك ارحمني 
وحاول متزعلش مني 

شكراً يا رب 

الخميس، 15 مايو، 2014

أنا ولا حد تاني

               
ممكن تسمع المزيكا اللى فوق دي لاول  اصل هقول كلام مش مفهوم المزيكا هتعدل الكلام شوية 


 موضوع انى انا واني نفسي ده مش قدره استوعبه يعني اانا مش عارفة ليه انا
 مش علشان انا مش عجباني لا انا عجباني بس ليه انا وليه انا مش حد تاني 
انا مخترتش اكون انا  فى البدايه 
بس هو انا ممكن اكون حد تاني فى نفس الوقت 
يعني انا ليه انا مش حد تاني 
طيب ليه انا هنا مش فى مكان تاني 
اوقات مش بكون فاهمه انا ايه 
يمكن اكون مش انا اصلا وانا بتخيل اني انا 
او اكون حد تاني وحد تاني متخيل انى انا 
علشان كده انا مش عارفة 
طيب لو انا حد تاني وهو متخيل انى انا يحاول يفهم انى مش انا علشان افهم 
مش عارفة طيب 
يمكن اكون مثلا  
طفل صغير فى الكونغو نايم
او اكون بنت فى فرنسا بتحب واحد وسافر بلد تانيه وقاعده تعيط
او اكون واحده بتقرر ترمي نفسها من فوق برج إيفيل
او اكون بنت من لبنان مسيحيه بتحب واحد مسلم واهلها بيقرروا بيقتلوها
او اكون كلب عايش مع ست عجوزه فى امريكا اللاتينية
او اكون راجل عجوز عايش فى ايطاليا وخايف يموت لوحده
او اكون قطه فى الشارع بتحاول تدور على اكل فى اى حته فى اثيوبية
او اكون بنت من اليمن بتتمرد وتقلع الحجاب وتتقتل فى النهاية
او اكون ولد من افغانستان مش فاهم حاجة
او اكون كوباية مايه فوق تربيزه فى بار فى لندن
او اكون فستان لابسه بنت مصرية عايشة فى تونس
او اكون ست صعيدية بتمشي الرجاله وبيخافوا منها
او اكون حرامي عايش فى العراق
ممكن اكون مش انا ولا تفتكروا انا انا اكيد انا ؟!
اتمني انى اصحي الاقي نفسي انا
مش عايزه اصحي الاقي نفسي حد تاني




الاثنين، 12 مايو، 2014

رسالة إلي صديق

المرسل : زرافة 
المرسل إليه : الطاووس 

تحية طيبة وبعد,
 
ارسل اليك هذه الرسالة لكي اخرك ما بداخلي لعل تشعر بما اشعر بي 
اشعر الان  بتحسن كبير يا صديقي الطاووس
 واتمني ان تاتي معي فى هذا العالم لكي تفهم ما اقوله وما اشعر بي انها ذكريات تأتي لي من وقت إلي اخر  
انا أشعر بوحده كبيره يا صديقي الطاووس 

وايضا 

اشعر بعدم الاحتياج إلي الاخرين وعندما افوق اشعر بعكس كل الأحاسيس الطبيعية 
اتمني ان تأتي وتحضر معك بعض الحلوى لكي اتذوقها وأشعر بمذاقها فى فمي الذي لا يستطعمها من قبل
انتظرك يا صديقي الطاووس لاني لا انتظر شئ ولا انتظر احد 

انتظرك 
أن تأتي يوما ومعك مركب ننقل فيه كل الاحباط ونرسله إلي مكان بعيد لا نعرفه .





الأربعاء، 22 يناير، 2014

مرحلة جديدة من حياتي مفهاش حاجة جديدة


زي ما انا 
نفس الشكل نفس الجسم مع زيادة الهالات السوده حولين عيني 
واحساس مختلف وعمر مختلف 
كبرت وإحساس المسؤولية كبر معايا 
نفس التفكير نفس عدم التجديد فى المواقف 
ممكن نقول مرحلة من العمر بتعدي "المرحلة اللى كل الناس بتقول انها احسن مرحلة" 
مفيش اختلاف مفيش اختلاف صدقني كل حاجة زي ما هي 
ناس بتظهر بسرعة وبتختفي اسرع 
ناس عايزاها بعيد وناس مش مهم 
ناس موجودة ومش موجودة 

عدم الانطلاق 
عدم النجاح
عدم الفشل 
عدم السعادة 
عدم الحب 
عدم الافتقاد 
عدم الشعور 
عدم الاهتمام 

بتفرج وانا مش شايفة 
بسمع وانا مش سامعة 
بتكلم وصوتي خافض 
بعبر من غير تعبير 

بدور عليك وانا عارفة انك مش موجود 
مش موجود غير هنا فى المكان بتاعي اللى مش موجود 
تفتكر هلاقي المكان ولما الاقي المكان هتكون موجود ولا هتزهق وتمشي ؟
انا مش زعلانة انا فى إنتظار إلانتظار 
فى انتظار المكان اللى فى نفسي 
كل كلامي شبة بعضه 
اصل انا نفس الشخص 
نفس الايد اللى بترزع على الكيبورد 
نفس الاحساس الضايع 
نفس الشخص التايه 
نفس النظرة 
ونفس فتحة البؤ لما يتفتح وانا مركزة 
نفس نفسي اللى مش بتتغير