الجمعة، 2 أغسطس، 2013

حـــــــــاجات من كل حاجه

تشرب قهوة الأول علشان تسمع بنفس ؟ 

حاجات كتير موجودة ومشاعر متخلفة تقليدية وحياه ممله لاقصي درجة ممكن تتخيلها 
حاجات عايزة اعملها وبعملها وحاجات مش بعملها 
وقيود جوايا مستخبيه فيها
 وقيود بكسرها 
وعدم راحه وراحة ضمير 

الجرس الانثوي لما يرن كل شهر و المشاعر الفايظة و التقلبات الداخلية 
واحساس بالضغط رغم الفراغ وعدم المسؤولية 

قصص حلوه وقصص وحشه مش عايزه افتكرها و بفتكرها 
تعلق الاشخاص بيك رغم عدم الرغبه فى التعلق بيهم 
احتياج نفسى عاجز 
بلونه منفوخه نيتروجين  بتطير لفوق ومش بترجع 

نشاط احباط فى نفس الوقت 
نجي نمسك الحبل يفلت فى النص 

بلد خربانه مأساوية لكل الناس اللى فيها 

نفسي اسافر 

ضحكة حلوه موجودة وضحكة مش موجودة 
حاجات بتمر على ذهني المشوش 

فاكره كل شخص كان مؤثر او مش مؤاثر مش بنسى حد 
معنديش عنوان اروح فيه 
انتِ مش تايهه لا 
موجودة معاكوا لحد دلوقتى بتأمل كل حاجه 

بحاول 

كلام حلو بسمعوا بيوصل جميل اه جميل بس بيخرج فى نفس الوقت 
معنديش مكان لحد جوايا 

صحرا الرمل بتعها اصفر مكان مُريح 

بروح بعيد ومش بعرف ارجع 
بسيب نفسى وارجع القيها فى نفس المكان فى انتظارى 

فكراك ياللى كنت بتحبنى اسفه انك كنت بتحبنى ووانا مكنتش واسفه ياللى بتحبنى دلوقتى 
يمكن مش حاسه بيكوا اصل عمرى ما عرفت احب !

حضن طنط جميل حتى لو مش صادق 
و الحضن اللى بالعين 

الاوضه و المزيكا و الحيطان 
الناس اللى عايزه اشوفها ومش مهم اشوفها 

مفيش ترتيب مفيش 
بس فى حاجات من كل حاجه .



فاهم ولا اجبلك قهوه تانية علشان اكمل اصل فى حاجات لسه عايزه اقولها 

الجمعة، 14 يونيو، 2013

من غير مقــــدمة




فى لحظة كل الاصوات اللى حواليه بتسكت وبسمع صوتى 
صوتى اللى خارج من دماغى 
دمافى اللى فيها حروب وصراعات مش بتنتهي 
دماغى بتتكلم وبتقول كلام كتير
 من غير ولا حرف
 بحاول اترجم الاصوات اللى خارجه 
لحروف منطوقه 
علشان اسمع صوت نفسى واشوف واحس اللى بيتقال جوايا 

انا عارفه شوية الحاجات 

جوايا مزيكا 
صوت فيروز و هى بتقول "انا فزعانه " 
وصوت منير وهو بيقول " الحقيقة و الميلاد " 
جوايا طفله بتلعب باسكت وبتجيب سكور و الجمهور بيشجع وهى حاسه انها طايره فى الهوا 
جوايا طفلة بتلعب مع ابوها و بيجبلها حاجه حلوه و جلى كولا =) 
جوايا طفله غضبانه وبتعيط 
جوايا بنت ماشيه فى الشارع وخايفه من كل الناس اللى حواليها وبتتلفت يمين و شمال 


 جوايا تمرد على كل العادات و التقاليد   


جوايا بنت مفتقده ناس كتير مش موجودين 
مفتقده الحنان والاحتواء و الحب و الحضن

 
جوايا ثورة عايزه تغير كل حاجه 

جوايا خمول وطاقة مكبوته 

جوايا نشاط وطاقة شغل وتدمير و تكسير 

جوايا بنت شعرها كييرلى وبيطير فى الهوا 



جوايا زرافة صغيرة =) 


الاثنين، 10 يونيو، 2013

اضحك الصوره تطلع حلوه

شخصية احمد زكى فى الفيلم شخصية عظيمه ومش موجوده
او موجوده وانا مش عارفه فين 
  كان نفسى يبقى عندى حد فى حياتى كده مش لازم ابويا بس يبقى نفس الشخصية

اكتر مشهد بيأثر فيه و بشوفه اكتر من مره فى الفيلم
 لما تكون خارجه تهانى من الجامعه بعد ما عرفت ان طارق  الشخص اللى بتحبه خطب بنت وزير
 وتخرج وهى فى حاله من الحزن وتلاقى ابوها "احمد زكى " بينادى عليها ويقولها  تهـــــــــالى
 الحضن اللى بيحضنهولها بحس بي وانا قاعده بتفرج  احساس بالاحتواء العظيم

مشهد تانى بين سناء جميل واحمد زكى 
 و سناء جميل هى الجده اللى بتفكرنى بجدتى
لما راحت عند ابو طارق رجل الاعمال الكبير فى الشركة
 ومرضاش الراجل يدخلها علشان شكلها 
ولما كانت بتحاول تعدى الشارع ومش عارفه من كتر ما الطريق بالنسبالها صعب 
ويجى احمد زكى يقولها : بتعمى ايه ياما ؟
تقوله: احنا صغيرين اوي يا سيد
يقولها : لا ياما احنا كبار اوى بس مش بينين 

والمشهد ينتهى بشوت  فى النيل لمركب صغيره وشكلها حلو 

و المشهد بتاع فرح طارق 
لما احمد زكي يتكلم عن العقد و عن فكرة العقد ويقول :
"هو العقود عندك ورق وبس 
حضرتكم بتخدوا قرارات بملايين الجنيهات وكل مره بتمضوا عقد 
ولا الكلمه بتبقى عقد 
العقد مبيعملش الحقيقه 
العقد بيثبتها بس
 كلمة انا بحبك عقد 
اللمسة عقد 
النظرة عقد
 الوعد بالجواز ده اكبر عقد "







الثلاثاء، 7 مايو، 2013

كلام واقعى


طول ما بتدى للواقع مساحته الطبيعية وبتعمل لنفسك الخيال بتاعك 

الواقع هيتلاشى

وهتلاقى نفسك عايش فى الخيال اللى انت عايزاه  
بس بيتحقق فى الواقع 
وطول ما انت مش بتبص على الواقع وبترمي ورا ضهرك 

الواقـــــع 

هيكبر هيكبر هيكبر  
وهيقف فى طريقك وهيخنقك 

الحياه فيها حاجات مش عايزنها  بس لازم نتعايش
 علشان نوصل للحاجات اللى مش واقعيه 

اللى فى دماغنا 

السبت، 4 مايو، 2013

مش مهــــــــم

فى لحظه من اللحظات

 لما تحس ان مفيش كلام ممكن يعبر عن اللى جواك مش علشان انت مضايق ومفشوخ فى الحياه لا 
علشان خلاص فكرة انك تتكلم و تحكى عن اللى مضايقك قديمه او خلاص ملهاش لازمه 
بس بتسكت بتسكت تماما 
لان مفيش كلام يعبر 
مش علشان انا عندى مشاكل بالعكس اانا معنديش مشاكل كبيره زى اللى بسمعها
 حياتى ماشيه برتم هادى 

حياتى عباره عن جفـــــــــاء 

جفاء اسرى 
جفاء اجتماعى 
جفاء عاطفى 

اه عندى احتياج زى اى بنى ادمه طبيعيه 
محتاجه ماما تحضنى وبابا يطبطب عليه زى الافلام 
او واحد احبه ويقولى كلام حلو واتبسط 
 
محتاجه احس ان فى كفا بتشيل كفا 
لكن مش كل حاجه زى بعض 

انا مش مضايقه علشان انا حاسه انى مليش لازمه وانى مش مهمه عند حد 

انا مقهورة

احساس بعدم الاحساس انك تحس انك مش مهم ....
لو انت مش موجود مش مهم 
ولو انت موجود مش مهم.... 
مش  مهم مش مهم مش مهم 
انا مش مهم ومفيش حد مهم ومش مهم انك تبقى مهم كل حاجه مش مهم 
ومش بقول غير مش مهم
 علشان ماحسش ان فى حاجه ممكن تبقى مهمه 

انا زهقانة من عندم الاهتمام 

حتى لو فى اهتمام الاهتمام شئ مؤقت زى الحياه ما مؤقتة 
وفى الاخر كل حاجه هتتحل 
و هرجع تانى عادى
 ولو عندى مشاكل هتتحل عادى
 مش مهم كل حاجه مش مهم 
وانتوا مش مهم 
 مش مهم 
مش مهم 
مش مهم 
 مش مهم 

الجمعة، 3 مايو، 2013

حكايتى فى الشــــارع


هو انا مختلفة  ممكن اكون مختلفة
طيب يا سيدى انا مختلفة
بلبس مختلف و شعرى منكوش
وبتكلم عادى زيكم ببؤى
بس العادى دلوقتى ان الناس اول ما تشوف حد خارج نطاق الشكل الطبيعى
 تقول عليه مختلف او مش طبيعى او مجنون
على فكره الطبيعى ان الناس تبقى مختلفة
ربنا خلقنا مش زى بعض ومش بنعمل كل حاجه زى بعض 


 تخيل كده... 

 
 كل الناس بتلبس زى بعض
 وبتاكل زى بعض
وببتكلم زى بعض
  هتبقى حاجة مملة جدا
 و احتمال ننتحر من الزهق
يعنى لازم نبقى مختلفين
يا جماعه هو ده الطبيعى وربنا!!
اهم حاجه انى مضرش حد
يعنى البس برحتى
اعمل شعرى منكوش منعكش
اتكلم بالطريقه اللى تعجبنى
اعمل من الاخر اللى يريحنى
على فكره مش هضرك  


صدقنى...


حاول تركز مع نفسك
هتحس انى عادى
 وانت عادى
 و هى عادى
و هو عادى
يااااا و نعيش مرتاحين ومحدش يضايق حد 


وارجوكوووووووا 

 
ارحموا بعض نقد
بصراحه انا بتعب اوى من التعلقات اللى ملهاش لازمه
يعنى فى كلام مبيأثرش فيا وفى كلام بيقلب اليوم كله
كل واحد ياخد باله من تصرفاته
ويصلح نفسه ويسيب الناس فى حالها
كل اللى نفسى فى مسمعش فى الشارع
انتِ يا انسه عامله فى نفسك كده ليه !
مع انى ببقى انسانة عاديه ماشيه فى حالى
او المعاكسات اللى ملهاش اى لازمه
او ابقى ماشيه فى امان الله القى شتيمه نازله عليه ماتينه اكنى كنت ماشية عريانه 


والسؤال:- 

 
 هو كل ده بيحصل ليه ؟
ليه الناس بتعمل فى بعض كده ؟


انا نفسى اعيش فى عالم مفهوش اى تعلقات ملهاش لازمه او حتى ليها لازمه
انا قادره انى اصلح نفسى
كل واحد يركز مع نفسه
عارفين لو كل واحد اتعامل مع اللى قدامه على انه انسان هيبقى فى اختلاف 
بتمنى من كل البشر اللى على كوكب الارض و مصر المحروسة بذات
 انها تصلح نفسها وتصلح بلدها 






وتسيب كل واحد فى حاله...

الاثنين، 8 أبريل، 2013

ورقــــــــــــــــــه ..



ورقــــه

 مرسوووم عليه رسمه بالقلم الرصاص  موجوده على حيطة فى اوضة انسان ...

تعدى الايام والسنين وهى لسه موجودع على نفس الحيطه بتتأثر بالهوا و التراب و الجو وبتنكمش
وفى يوم وقعت على الارض وصاحب الاوضه شالها لانه كان بيحبها وحطهه على الحيطه تانى

بس فى مره وقعت

 ومجبهاش و ترمت فى الشارع ممكن نقول طارت المهم انها بقيت فى الشارع
كل يوم تبقى  فى مكان مختلف
 يوم فى مدينة نصر
ويوم فى الهرم
 ويوم فى وسط البلد
ويوم فى الصعيد
ويوم فى الشرقية
وفى النهايه تتجمع مع ورق كتير
وتبقى بين ورق
وتروح مصنع اعاده تصنيع الورق
وعلشان هى ورقه كبيره وتخينه بقت من ضمن ورق اسكتش رسم

ودى كانت من اسعد لحظات الورقه...

اتحطت فى مكتبه وسط كرسات رسم كتير

وبعدين

 اشتراها ولد صغير ورسم في كراسة الرسم كتير
وكان فى مسابقه فى المدرسه لاحسن رسمه بتعكس الحاله النفسيه للطالب
الولد قطع من الاسكتش وكانت هى الورقه وابتدا يرسم
الرسمه كانت عباره عن
 " شمس وقمر وطريق وشمعه ووردتين واحده بيضا وتانيه ملونه وطيور ما بينهم وشخص من غير ايدين بملامحه بارزه "

ولونها وخلصها
وتانى يوم وداها المدرسه
بس مكنش عايز انها تتحط وسط الورق لانه كان حاسس انها مميزه
فخدها وزخرفها بقماش وجلدها وحطها فوق كل اللوح
وكان مبسوط لانها مش زى اى لوحه
ويوم اعلان المسابقه لوحته كانت من احسن العشر لوح
واصلا السبعه الاوائل كان ليهم جايزه ماديه غير الشهاده
وبداوا يقولوا اسم الفايزين

الاسم الاول مكنش هو 
ولا التانى 
ولا التالت
ولا الرابع
ولا الخامس
ولا السادس 

ولا السابع او التامن او التاسع بس كان العاشر

فحس ان لوحته احسن من كده وانهم مقدروهاش
 فحب يروح ياخد اللوحه قالولوا لا لانها هتتحط فى المعرض
فأصر انه لازم يخدها
ولما روح حطها فى اطار اوبرواز
 قصاد سريره وبقى كل يوم يتفرج عليها
قبل ما ينام
ويشوف الشمعه بتتحرك
والشخص كمان
 ويشوف فيها افلام يعد يكتبها
كل يوم مختلفه عن التانى
وتمر الايام ويكبر الولد
واللوحه لسه موجوده زى ما هيا

 كانها لسه مرسومه امبارح 

وبعد كده قرر انه يكتب فيلم مستمد من اللوحه واللى بيشوفه كل يوم
وفيلمه اتعرض
وكان من احسن الافلام القصيره اللى اتعملت

وبقى سعيد ان لوحته مطلعتش الاولى على المدرسه...

الأربعاء، 20 مارس، 2013

الاخوان خايفين ليه من الجرافيتى ؟!




دى بعض  الحاجات اللى  صورتها وانا موجوده يوم المقطم ...
 اسفه على الصرااخ 
بس مكنتش قادره اتحكم فى نفسى 
كان فى طوووب واسلحه بيضاء ودم...
 وانا مش بعرف اخش فى معارك فيها دم 
  انا انسانه سلمية غصب عنى للاسف
اللى زى دول محتاجين الدم بالدم ! 
كان نفسى اكون اقوي من كده ...

الأربعاء، 13 مارس، 2013

كلام دخل جــــوايا


كلام من "امل" صدقتى الصدوقه =)

كان فى زرافة بتحلم تطول السمـــــــــا 

انتظرت اللى يجى يحققلها حلمها 

طول انتظارها كان طول رقبت اطول زرافة فى عصرها 

قابلت سيد قشطة فى طريقها ووعدها يحققلها حلمها 

خدها على ضهره 

وقالها يلا طولى السمـــــا =) 





السبت، 9 مارس، 2013

احلام تقلب تاريخى

من ساعة ما جدتى ما بقتش موجوده فى الواقع 

 وانا بحلم بيها كل يوم تقريبا
 يوم افتكر الحلم واتأثر بى
 ويوم تانى انسى وابقى عايزه افتكر
الاحلام بتأثر فيا بشكل كبير وبيبقى ليها علامات فى حياتى 

بداية الحلم جدتى واقفه وانا بتكلم معاها وبقولها على حلم قديم حلمته بيها قبل كده 
 "حلمت انى ماسكه ايدك و بعيط بصووووت عالى وبقولك موتي ليـــــــــــــه وانتِ واقفه مش بتكلمى وساكته "

وبسألها فى الحلم اللى كنت بحلمه مش شويه تانى انتِ موتى ليه بجد كنتى خليكى معايا 

جدتى ردت عليه : انتِ عارفه اللى بيموت بيبقى موجود معاكى فى كل حته 
هو لسه فى المكان 
بس اللى بيختلف ان محدش بيشوفه هو بس اللى بيشوف الناس اللى حواليه
قولت لى جدتى  : يعنى  لو اى حد مات هيبقى معاكى عايش معاكى 
يعنى لما اموت هبقى معاكى كمان
قالتلى اه وعادى وهنعيش عادى زى اى حد عايش
 بس محدش بيشوفنا غير لو هو عايز يشوفنا زى ما انتِ شايفانى كده 
وكانت بتكلمنى عن اللى بيموت و بتقولى ان الموت ده حاجه سهله جدا مش زى ما الناس بتقول  

فى كل حلم جدتى بتقولى خدى بالك من نفسك وبتقولى على حاجات اعملها بس مش بفتكر غير خدى بالك من نفسك .. 

وفى الاخر 

بقوم من النوم واكتشف انه حلم واضايق علشان عايزه اشوفها 

مبسوطه انى بحلم بيها كتير ومضايقه انها مش موجوده فى الواقع ....

الأحد، 3 مارس، 2013

حصل .. محصلش

 
مش بيحصل كتير ولما حصل محصلش حاجة ..
كان لازم يحصل علشان مفيش حاجة تحصل ..
واللى حصل حصل علشان اللى حصل محصلش فى الواقع
 
بس انا بنسبالى الواقع محصلش !
 
فى حاجات بتحصل علشان ميحصلش حاجة 
بس اللى حصل بيحصل وانت عايزه يحصل
ومش بيحصل فى الاخر ..
اللى حصل كان حلو علشان مش واقعى 
 
اللى حصل مش موجود 
 هو اصلا محصلش  

 بس اللى حصل اتكسر !
 
 
 

السبت، 16 فبراير، 2013

حــــــــــــــــاجة


عارف لما تبقى مستني حاجه وبعدين تيجي حاجة تانيه تنسيك الحاجة الاولى وبعدين تيجي الحاجه الاولى تحس ان ايه ده يععع

عارف لما تكون مش عارفه تقول الحاجه اللى انت عايزه تقولها علشان مينفش تقولها ..

عارف لما تكون بتتكلم عن حاجة وحد يجى يفتكر حاجة تانيه ...

 عارف لما تكون بتشرح حاجة وانت مش عايز تشرح حاجة 

عارف لما تبقى مضطر تعمل حاجة علشان محدش يقول  حاجة 

عارف لما تبقى بتعمل حاجة علشان تتبسط يحصل حاجة تقرفك 

عارف لما تقصد تعمل حاجة لحد حلوه ويفهم انك بتعمل كده علشان حاجة 

عارف لما تضحك على حاجه وحد يجي يفكرك بحاجة تضايقك


عارف لما تبقى عايز تتعلم حاجة 

عارف لما تبقى مش حاسس بحاجة 

عارفه لما تحس انك ولا حاجة 

عارفه لما تبقى عايز تروح فى مكان ومنعاك حاجة

عارف لما تبقى مقتنع بحاجه لوحدك

عارف لما تنام علشان تحلم بحاجه 

عارف لما تكون بتقول اى حاجه 




عارف لما تكون مش عارف  حاجة ..

حكايه تانيه من الخيال

"كارل والوليه" 

الفيلم بيبتدى بواحده ماشيه فى الشارع لابسه ملابس داخليه..

ماشيه و عندها نشاط جامد جدا بتجرى شويه تمشى شويه بس مبتسمه جدا
بتخش محل بتاع فول و طعمية ..

بتقول للراجل اللى واقف : عايز سندوتش فول بالزيت الحار و بتنجان مخلل يا برنس
الراجل بيبص بكل استغراب و يبقولها استرى نفسك يا وليه
بترد عليه البيت وبتقوله انا بقولك هات سندوتش مش بقولك قولى اعمل ايه وانت مال امك لامؤاخذه يعنى


 الراجل يقولها : شكلك مش مجنون يعنى انتِ ازاى ماشيه كده ازاى تعملى كده

 وبيجى يقرب منها علشان يغطيها بالجكيت بتاعه تختفى من قدامه

الراجل بيحس انه مجنون وان اللى حصل ده مكنش حقيقى

 وحاسس نفسه ان ده خيال وانه اكيد بيتخيل لان مفيش حد علق على الموضوع من اهل الحته غيره 


تانى يوم تنزل البنت بنفس البس الداخلى و تروح عند نفس المحل و تقوله عايزه سندوتش فول و بتنجان مخلل 


الراجل المره دى مش بيرد على البنت وواقف مستغرب وبيبص عليها ومش عارف يقول ايه ..

 وهى واقفه بكل ثبات وبتقول نفس الكلام
الراجل ابتدى يخاف قالها انتِ انسانه ولا عفريت اصلك شكلك حلو ازاى واقفه كده لو انتِ انسانه


البنت بتختفى برضه 


والراجل حاسس انه مش طبيعى و حس انه لازم يتجوز ادام بيتخيل ببنت لابسه اللبس الخارج ده
الراجل قاعد باليل تحت الشجره وبيفكر فى الموضوع ومش فاهم ايه اللى بيحصل يعنى ايه اللى انا بشوفه ..

و بيتخيل شكل البنت ازاى كانت حلوه
وبيقول البنت رغم اللى هى لابسه بس كان فيها حاجة  غريبه 

وقال لو جت بكره هديها سندوتش الفول و البتنجان وشوف ايه اللى هيحصل

تانى يوم استنى الراجل البنت ام ملابس داخليه وحضر سندوتش الفول و البتنجان 

بس البنت مجتش المره دى 

الراجل قال اكيد انا خلاص اتجننت واصلا مفيش ولا بنت ولا بتاع بتيجى وانا لازم اتجوز


راح لواحد صاحبه قاله : بقولك ايه انا عايز اتجوز مفيش واحده بنت حلال كده اتجوزها انا راجل مقتدر وعندى مطعم فول و طعميه
صاحبه قاله : عندى ليك عروسه بنت حلال فشخ اسمها الوليه بس البنت دى مش بتخرج من البيت على طول فى البيت محترمه جدا


الراجل قال لصاحبه :اسمها ايه الوليه وده اسم ده ... رد صاحبه يا ابنى دى حلوه جدا
بس اهم حاجه اوعى تتريق على اسمها علشان هى الله اما احفظنا مخويه ..

رد الراجل لا يا عم انا بخاف من الحاجات دى
قال الصاحب الراجل لا بالعكس دى تريحك خالص دى مش بتكلم كتير زى الستتات وبعدين بتعرف تعمل كل شغل البيت انت هترتاح جدا


الراجل قال على بركة الله يلا بينا نشوفها ونتعرف على اهلها وهو زتنا فى دققنا



راح الراجل هوو صاحبه .. بيخبط على الباب فتحت بنت صغيره شكلها غريب جدا صاحب الراجل قال للبنت ازيك يا خرشوفه نادى بابا يا حببتى
الراجل قال لصاحبه ايه ده هى البنت الصغيره دى اخت العروسه اكيد هتبقى شبه اختها لا لاانا مش عايز اتحرج مع الناس انت تقول للراجل اى حاجه
قاله لا يا عم مش زى اختها دى حلوه جدا ,,,, رد عليه الراجل وقاله لا لا اسمع اللى بقولك عليه انا مش عايز احرج نفسى صاحبه قاله انت حر


دخل ابو العروسه شكله هو كمان غريب جدا الراجل قال فى نفسه الحمدلله انى نبهت الواد كنت هروح فى داهيه
صاحب الراجل قال لابو العروسه ازيك عامل ايه انا بس كنت جاى اسأل عليك واعرفك على صحبى علشان احنا جران ومش عارفين بعض والنبى وصى على سابع جار زى ما انت عارف 


الراجل حط ايده على قلبه وقال الحمدلله هو انا ناقص قرف ايه العيله الوسخه دى انا ناقص مش كفايه شكلى غلط اخلف عيال ايه بقى


ابو العروسه بكل لطف و زوق قال اهلا وسهلا انتوا تنوره والله 

يا وليه هاتى حاجه سقعه للضيوف .. 

دخلت الوليه بالحاجه السقعه 

اول ما دخلت الوليه .. 

الراجل جاله حاله من الهبل بنت طويله جدا و وعنيها واسعه  وحطه كحل وشعرها طويل ورحتها جميله فشخ

فضل فاتح بؤه اكتر من 5 دقايق وصاحبه يخبط عليه علشان الاحراج يعنى احنا فى بيوت ناس وكده وهو ولا هنا


تخيل الراجل فى ال 5 دقايق البنت اللى كانت بتجي لابسه ملابس داخليه المطعم وانه مش فاكر شكل البنت بس فاكر الجسم بس
وحط الجسم على الشكل البنت اللى قدامه قال انها ممكن تكون هى اصلا وبعدين مش مخاويه ممكن يكون العفاريت هى الللى بتعمل فيها كده 


بعد ما فاق من التخيل اللى كان عايش فى ...

 قال للبنت هو انتِ اللى كنتى بتجى المطعم الصبح عايزه سندوتش فول و بتنجان
البنت بصت للراجل اكنه مجنون مثلا

 رد ابوها وقاله الوليه مش بتنزل من البيت اصلها حلوه فشخ وانا بخاف عليها من التحرش اللى بيحصل فى البلد

الراجل بص اكتر للبنت وقالها لا انتِ اللى بتجى انا متاكد انتِ حته بتجى بالبس الداخلى 


ابو العروسه بص للراجل بغضب فشخ 

و قاله: عيب يا استاذ اللى بتقوله ده ملابس داخليه ايه انت عايش فين بنتى مش بتنزل من البيت اتفضل اخرج بره
الراجل قال: لابو الوليه ... 

انا مقصدش حاجه يا حج والله طيب انا عايز اتجوز بنتك الوليه ممكن
اول ما قال كده بص على الوليه لاقها لابسه فعلا ملابس داخليه قدامه ونفس الشكل اللى كانت بتقف فيه فى المحل
الراجل استغرب جدا وقال للراجل اهى اهى يا حج بنتك لابسه ملابس داخليه اهى انا مش مجنون 


ابو الوليه اتعصب اكتر وقاله: انت مجنون انت مش طبيعى يا كارل تعالى خرج الحيوان ده بره ...

 دخل كارل اخو الوليه وضرب الراجل
كارل قال : للراجل معندناش بنات للجواز اخرج بره اخرج بره

 الوليه لابسه محتشم جدا بس انت مش شايف غير اللى عاقلك شايفه
وهو بيضرب بوكس ورا بوكس ورا بوكس اخد نفسه وبص على الوليه لاقها فعلا لابسه لابس عادى جدا


حاس فى لحظه انه حيوان 



 النهاية

الجمعة، 15 فبراير، 2013

انا مش مهتميه ...

انا مش مهتميه بحاجة  

مش مهتميه بحد  
مش مهتميه بنفسي
 مش مهتميه انى اعمل اي حاجه فى اي حاجة 
مش مهتميه بالثورة و بأى احداث بتحصل .. 

هو فى ثورة اصلا ؟! 

مش مهتميه انى اوصل لحاجة 
مش مهتميه ان فى حد زعلان منى 
مش مهتميه انى زعلانه من حد 
مش مهتميه انى اضحك 
ومش مهتميه انى اعيط 
مش مهتميه ان حد يقول عليه حلوه 
ومش مهتميه ان حد يقول عليه وحشه 
مش مهتميه ان تصرفاتي تعجبكم او متعجب كمش 

ومش مهتميه ان احب حد ولا حد يحبني 
مش مهتميه بالحياه 

ومش مهتميه باللي انتوا مهتمين بي 

اللى مهتم مهتم ليه واللى مش مهتم مش مهتم ليه ؟!! 
طيب نهتم ليه طيب جتكم القرف  ؟؟




 انا  مش مهتميه  وخلاص بقى ...

السبت، 9 فبراير، 2013

اشكرك ايها القـــــــــــــدر

ساعات القدر بيعمل حاجات
بتبقى وحشه و صعبة فى ساعتها 

بس يتعرف فى النهاية
 ان القدر هو الصح
وانك كنت مش عارف تاخد الخطوه
وكانت صعبه علشان
 هى حاجة وحشه او مش ليك 


شكرا ايها القدر ..

الاثنين، 4 فبراير، 2013

حكايـــة

  

ولد صغير من اطفال الشوارع عنده حوالى 16 سنه 
الولد اتولد فى الشارع ومش عارف مين امه ومين ابوه
بس عارف ان اكيد  لى ام واب وحاسس انهم بيدوروا عليه 
وفى يوم هيرجع البيت ويعبش معاهم 
الولد ده طول الوقت مش عايز يعمل حاجه زى الولاد اللى عايشين فى الشارع 
يعنى مش بياخد فلوس من حد كده
 لازم يشتغل 
عنده عزة نفس جامده جدا 
وفى يوم قرار انه عايز يتعلم ويبقى بيعرف يقرا 
دخل مكتبه وقال للراجل اللى واقف فى المكتبه انا عايز كتاب لمحو الاميه 
الراجل استغرب وبصله بقرف جدا
 وقاله :العب بعيد يالا يلا من هنا عيل ابن كلب امشى ..
 الولد يقوله : هديك فلوس والله 
الراجل معندهوش اى انسانية ضربه بالعصايه علشان الولد كان عايز الكتاب ومصمم 
خرج الولد فى حاله من الانهيار لانه عنده عزة نفس و عمره ما عمل حاجه وحشه فى حد ...
 بس كان عايز ينتقم من الراجل ده بشكل غريب

اشتغل الولد بياع مناديل فى الاشارات و جمع فلوس واشتره لبس حلوه جدا تخليه شبه اى ولد عادى
وراح عند مكتبه تانيه وسأل الراجل على الكتاب و اشتره فعلا 

وهو خارج  

كان حاسس ان كل حاجه هتتحقق قدامه وانه هيتعلم و يشتغل و يتجوز ويعمل كل حاجه ويعيش فى بيت 
المكتبه اللى اشتره منها الكتاب  كانت قريبه من ميدان التحرير
وهو ماشى فى ميدان التحرير لاقه فى ناس بتجرى و خيم موجوده وناس بتهتف مكنش فاهم ايه اللى بيحصل
 بس كان مبسوط اوى وهو ماسك الكتاب  
دخل على ناس فى الخيمه 
وقالهم : انا مش فاهم هو ايه اللى بيحصل فى الشارع 
ردت عليه بنت  شرحت كل حاجه ليها علاقه بالثوره
الولد قالها طيب انا عايز اتعلم اقرا علشان افهم بعد كده 
انا جبت الكتاب اهو ممكن حد فيكوا يعلمنى
البنت ضحكت وقالت للولد انا هعلمك و اخليك تخش المدرسه كمان تكمل .. 
اتبسط اوى الولد  
مره واحده سمع 
 صوت ضرب نار جامده و ناس بتصرخ بصوت عالى وناس بتجرى 
خرح بره الخيمه لاقه الجيش بيفضى الميدان و بيهد الخيم
خاف الولد على حلمه انه يبقى بيعرف يقرا و يشتغل و يتجوز ويعيش فى بيت ...

 وهو بيفكر وبيحلم قرب الجيش من الخيمه اللى واقف عندها
 وضرب  الولد على دماغه اللى بيحلم بيها 
و رمه فى الزباله .. 
والولد بينزف و الكتاب لسه فى ايده والحلم لسه فى دماغه

 وروحه عند ربنا ...


النهاية

الأحد، 3 فبراير، 2013

غير واقعي

 فى عز الحزن

 فى ناس  بتيجي سيرتهم بترتاح 
رغم انهم مش فى حياتك
 بس ليهم وجود جواك
 او انت بتحاول تخلق شبح جواك يخرجك من اللى انت فى !
وتحاول تصنح احلام غير واقعيه علشان تصدق 

وبتصدف ..
  
بس بتبقى عارف انهم مش موجودين 
وانك عامل ده بأرادتك 
ولما بيظهر بتبقى خايف الشبح يختفى 
و تفضل تدور على شبح مش موجود 


غير فى حلامك الغير واقعية ...


الاثنين، 28 يناير، 2013

مش بمزاجي!


انا مش موافق على اى حاجة بتحصل فى الحياة .. 


مفيش حاجة بتحصل بمزاجى !

انا مولوده مش بمزاجى !

واسمى مش بمزاجى !

ومش بمزاجى انى بنت ..

مكانى مش بمزاجى !

ولا اخترت بلدى انا مجبرة اكون مصرية !

ولا اخترت الدراسه بتاعتى !

ومش بمزاجى مرسى رئيس !!

ومش بمزاجى تحبنى ومحبكش 

ومش بمزاجى احبك ومتحبنيش  ..

مش بمزاجى انى مش بعرف العب "كرة سلة" كويس دلوقتى ..

ومش بمزاجى انى بخاف من حاجات معينة 

ومش بمزاجى انى بحب حاجات المجتمع مش بيحبها 
  
 ومش بمزاجى انى بكتئب لما ابويا يتعب !

ومش بمزاجى انى مكشره و زعلانة على البلد اللى عايشه فيها  

مش بمزاجى لما ازعل من حد .. 

ومش بمزاجى يكون عندى احباط طول الوقت !

مفيش حاجه بمزاجى ليه ؟؟!

كل حاجة بتيجى مش بمزاجى ويا احبها او محبهاش...

الثلاثاء، 15 يناير، 2013

فى حد بيتكلم فى ودانى !


اه فى حد كل شويه يقول كلمه فى ودانى
 كل شويه اسمع حد يقولى حاجه 

مش خايفه من الصوت

 بس مش عارفه اللى بيتكلم بيقول ايه !
ساعات بسمع اغانى
 وساعات بسمع كلام مش مفهوم 
وساعات بسمع اذان مش فى ميعاده
وساعات بسمع عياط 
وساعات بسمع ضحك

 كل ده فى دماغى بس  بصوت انا سمعه 
وساعات بحس بى .. 



بسمع دايما الاغنية دى.....



الثلاثاء، 8 يناير، 2013

حقوق الموبايل يا بشر !!


اول مره لما اتسرق موبايلى كنت مضايقة
 علشان حاجة واحده حاجه واحده بس ! 

وكنت مضايقه لدرجة انى مش عارفه انام ..

وتاني مره  لما اتسرق الموبايل كان فى نفس الحاجه 
بس مزعلتش خاااااااااااالص !!

عارفين ليه علشان المشاعر بتتغير.. 
..............................................................................

الاثنين، 7 يناير، 2013

مجــــهـــــــول

...........................................................................................

متعوده اقعد على "الاسك اف ام" وانا عندى فراغ  او زهقانة
اقعد اشوف الاسئله بتاعت الناس 
كتير اوى بتبقى اسئلة ملهاش معنى بزهق اكتر و اقفل
 لكن اوقات يبقى فى ناس بتشتغلنى وبكون حاسة بس بلعب معاهم =) 
واقات بتبقى حاجات حقيقة وده قليل .. 
من كام يوم واحد بيقولى انا عايز اجبلك هدية بس مش هتشوفينى يعنى تستلمى الهدية بكلمة سر 
عجبنى اوى الموضوع بصراحة
احساس انه يجيلكم هدية مش معروف صاحبها دى حاجه مخيفه
و فى نفس الوقت حلوه جدا 
طبعا حسيت الموضوع اشتغاله من اصحابى الحلوين .. 
وبعيدين ليقت الموضوع بشكل حقيقى جدا واللى بيتكلم بيتكلم بجد
قالى هتروحى ديوان هتسألى على شنطه باسمك هناك استلمها 
وكان كل ده فى دماغى مقلب برضه
 بس حسيت ان لو ده مقلب  هيبقى مقلب لطيف جدا ومش هضايق ... 
لقيت الشخص المجهول تانى يوم عامل اكونت على التويتر علشان يتكلم معايا و بيأكد عليه انه جاب الهدية ولازم اروح استلم
 بصراحه حسيت برعب جدا ايه ده بيتكلم بجد يعنى مش بيهزر 

.....................................................................

النهارده روحت و انا حاسة ان صحابى هيطلعوا من المكتبة و يقولولى ببرابابا ببرابابا ونقعد نضحك 
بسأل الراجل فى شنطه باسم كذه كذه قالى ايوه اتفضلى بفتح الشنطه لقيت كتابين =) 
خرجت من المكتبة وانا مش مصدقه مبسوطة حاسه ان اللى حصل ده حاجه حلوه 
واللى عمل كده اكيد عارفنى و عايزنى اكون مبسوطة وبعدين 
حتى لو انا معرفهوش زى ما هو بيقول ليه بيعمل كده !! 
اسئلة كتير فى دماغى بس عايزه الموضوع يفضل كده هدية مختلفة 
حد اعرفه حد معرفهوش انا مبسوطة مش عايزه افكر كتير ... 

احسن حاجه فى الدنيا انك تجيب لحد كتاب هدية يبقى معاه فى وقت فراغه
 بس الاحسن ان يبقى الشحص ده مجهول من غير اى هدف 
هو قالى اانا عايز اجبلك هدية من غير ما تعرفينى ومش عايزك تعرفينى 


طلع بجد و الهدية بجد وهو بجد ..


انا سعيده بالتجربه وبفكر اعمل كده فى حد بحبه علشان يبقى مبسوط هو كمان 
انا مش عارف اشكرك لانى معرفكش يمكن تقرا الكلام ده ! 

وتعرف انك خلتنى مبسوطة =) 

وهيفضل الموضوع فى دماغى دايما ولما حد يقولى ايه احسن موقف مجنون هحكى على الهدية المجهول صاحبها 




بس خليك مجهول علشان انا بحب كل حاجه مجهولة ..

الثلاثاء، 1 يناير، 2013

اصنع الانســـــــــــانية !

............................

انك تبقى انسان مش حاجه سهله كده

على فكره انت لسه مش انسان ..

انت مجرد كائن يصنع الانسانية لنفسه ..

بس خليك فاكر انك مش انسان 

وعندك ديل كمان 

بس كمان  مش حيوان !

نشيد الى ايزيـــــــــــــس

.................... 

لأنني الأولى و الأخيرة 
لأنني الُمبجًلة و المحتقرة 
الزوجة و العذراء 
الأم و الابنة 
لأنني ذراعا أمي 
لأنني العاقر ولأن أولادي لا يحصون 
لأنني من تنجب  ومن لم تنجب قط 
لأنني العزاء فى الام والولادة 
لأنني الزوجة والزوج 
ولأنى رجلي هو الذى خلقني 
لأنني ام ابى 
لأنني اخت زوجي  
ولأن زوجي هو ابن الذى تخليت عنه 
لأنني كل ذلك 
قدموا لي الاحترام على الدوام 
فأنا الفاجرة وأنا المرأة النبيلة .. 




                                    نشيد الى ايزيس ..(القرن الثالث الميلادى او الرابع ) 

                                      اكتشف فى نجع حمادى !