الأحد، 26 فبراير، 2012

اعظم ست فى الدنيا


كل حته فى البيت فيها ذكريات حلوه بضحك لما بفتكرها  وبزعل لما بفتكر انى مش هشوف اعظم ست فى الدنيا   تانى
كنت عارفه ان ستو دى احسن ست فى الدنيا  بس مكنتش مستوعبه الكلام ده

كنت كل يوم بشوفها و انا رايحه  الجامعه وتقولى ايه االقمر ده حفتدتى ذى القمر هما الولاد مش بيشوفوا  ولا ايه

كنت بحس انى مرتاحه لما بشوفها قبل اى امتحان وقولها يا ستو انا عندى امتحان صعب ومذاكرتش كويس تقولى ربنا جميل يا سلمى هتحلى كويس ان شاء الله مع ضحكتها الجميله وانا خايفه من الامتحان بتنسينى كل الخوف اللى جوايا

كان عندها نشاط تقوم بدرى تفطر وتنزل تجيب عيش كنت بتخانق معها وقولها لا متنزليش ممكن اى حد يجيب عيش
تقولى انا لو قاعدت فى البيت هتعب يا بنتى انا بحب اتمشى
كانت بتقاعد مع واحده جارتنا عندها سوبر ماركت فى الشارع .. وانا راجعه من الجامعه تقولى يلا يا حببتى مشوار الجامعه صعب يلا اطلعى كولى وتغذى وتسند عليه بايدها الجميله ورحتها الحلوه

منكرش انى كنت ساعات بزعلها بس لما كنت بقولها اى كلمه حلوه او  ابوسها كانت بتنسى كل حاجه وتقولى انا مش بفتكر حاجه  وحشه اصلا
كانت ساعات بتقاعد تعيط  وقولها مالك يا ستو تقولى مشكله بتاعت حد غريب ممكن كمان ميكنش من العيلة  وقولها يا ستو سيبك من مشاكل الناس .. تقولى انا لما بشوف الناس اللى حوليا مبسوطه بتبسط انا كمان
 كانت بتحب تحل مشاكل الناس .. وكانت بتقدر

كنت لما مش بيعجبنى اكل ماما تقوم تعملى احسن اكل فى الدنيا لما كنت بقولها الله يا سحس حلو الاكل اوى تنبسط اوى  وتضحك
كانت على طول بتقولى يا بنتى انا محتاجه حد يطبطب عليه بس مش عايزه اكتر من كده
 كانت من اقل كلمه بتتبسط ....وحساسه جدا ومش بتطلب حاجه  غير  مره واحده  لو معملتش تقوم هى وانا  اجرى وراها وقولها خلاص هعمل اللى انتى عايزه  

كانت  على طول تدعى  انها تفضل وقفا لغاية اخر يوم فى عمرها  وربنا قبل دعوتها الحمدلله
وكانت لما تقولى خلاص يا سلمى انا هموت اقولها لا متقوليش كده انا هموت لاول .. تروح مصرخه وتقولى
لا طبعا  يا رب ماشوف اليوم ده ابدا



كنت بحب امسك ايدها المكرمشه الجميله والعب فيها
مش قادره انسى وانا مسكا ايدها وهى جسد من غير روح كانت ساقعه  اوى  كنت  عايزه ادفيها كان نفسى احطها جوه قلبى علشان ترجع تانى وتقولى اى حاجه  
اول مره اشوف حته منى جسد من غير روح
كنت بقولها انا بحبك اوى سامحينى سامحينى على اى حاجه اناعملتهالك انا مكنتش فاهمه يعنى ايه ممكن متكنيش موجوده فى الحياه كنت حاسه ان الموت ده حاجه بعيد اوى

 مش عارفه هعيش ازاى من غيرك ومش هقدر انساكى ولا انساه اى كلمه  قولتهالى

يا اعظم ست فى الدنيا