الثلاثاء، 31 يناير، 2012

تحــــــــــــــــرش جوايا


اخترت عنوان غريب انا نفسى مش عارفه يعنى ايه تحرش جوايا بس حسيت ان ده اقرب معنى ممكن يعبر ع اللى جوايا   ...

انا بخاف من التحــــــــــــرش

يمكن علشان حصلى كتير
او يمكن علشان بدمر لما حد يلمسنى ؟!
بحاول افهم انا ليه الموضوع مأثر معايا كده ؟!
بحاول افتكر انا ليه بخاف وانا ماشيه لوحدى ؟!
لما بكون فى زحمه بحس ان كل الناس اللى حوليه  هتتحرش بيه
ولما بكون ماشيه لوحدى بقعد أتلفت حوليه زى الحرمية وبحس  ممكن حد يجى من ورائى ويلمسنى
ليه الموضوع وصل معايا بشكل ده ؟!
                                                    ليه ؟!!!!!

ده السؤال اللى بقالى كتير بدور على الاجابه بتاعته
قاعده مع نفسى وقاعده افتكر ايه اللى جرالى يمكن اقدر اعالج نفسى

انا بروح تقريبا كل الاماكن من وانا صغيره لوحدى
كنت بلعب كره سله وانا عندى تقريبا 8 سنين
وانا اصغر اخواتى اخويه وصلنى  مره واحده النادى ومحدش كان فاضى يوصلنى بعد كده

 انا حبيت اوى كره السله وستمريت اروح النادى كنت فى ثالثه الابتدائى بظبط
انا بفتكر.... 
بفتكر ايه اللى حصلى لما ابتديت اتعامل مع الناس فى الشارع !!
كونت بركب ميكروباصات لان اسرتى اسرة متوسطة الحال
يعنى مش هينفع اركب تاكسى كل تمرين  ..

اول موقـــــــــــــــــــــــــــــف
 بفتكروا دلوقتى وانا مصدومه
كنت راجعه من التمرين ومبسوطة جدا لابسه بدى اصفر فاكره الموقف اكنوا دلوقتى  كنت فى ثالثه ابتدائى
قاعدة جنب  راجل اد جدى  ...مكنتش  فاهمه يعنى ايه حد يعملى حاجه كنت صغيره صغيره اوى !!
راح الراجل اللى اد جدى ده حط ايده على راجلى وبعدين على صدرى اللى لسه بيطلع  !!
مكنش لسه عندى صدر بس هو حط يده على صدرى 
 وانا قاعدة اشيل ايده بمنتهى البراءه و هو يحطها تانى على صدرى وعلى رجلى
نزلت من الميكروباص بعيد عن بيتى وقاعدة اجرى فى الشارع واعيط بشكل هستيرى اكينى  حد ضربنى

 انا مكنتش فهمه ايه اللى حصلى فعلا 
كنت حاسه احساس مضايقنى او احساس ان حد جرح  طفولتى البريئه
يمكن اكون حكيت الموضوع ده لاختى بس مش بنفس الطريقه او مش  بنفس التفصيل دى
علشان انا مكنتش عايزه افتكر اللى جرالى !
بس لازم اواجه نفسى يمكن مخفش تانى وانا ماشيه فى الشارع ..

تانى موقـــــــــــــــــــــف
كنت راجعه برضه من النادى و  النادى بتاعى فى شارع ضلمه شويه
 بس الموقف ده كنت كبرت شويه يعنى عرفت يعنى ايه تحرش كنت فى 5 ابتدائى كبيره يعنى كبيره اوى =)
وفكره الموقف اكنوا دلوقتى برضه
كان فى الشتاء فى عز البرد ولابسه جاكيت لونه بينك
وماشيه وبمد بسرعه اوى علشان انا اصلا بخاف من الضلمه
مره واحده لقيت ولداين يعنى فى سن 19 او 18 مثلا  كبار اوى بنسبالى
اعدى الشارع يعدو ورائى ابتدات اجرى راح واحد منهم جرى ورائى
 وراح مسك صدرى الصغير اللى مش باين من الجاكيت !!

وانا زى المجنونة بنـــــــــادى على اخويه اللى مش موجود بنـــــــــادى بصوت عالى  جدا
و الولد يقولى خلاص بعد ايه اعت اجرى عكس الطريق اللى المفروض امشى منه و انا بعيط عياط هستيرى و بنادى على اخويه
لحد مالقيت كابتن من النادى قالى :  مالك  فى ايه ؟
مردتش احكيله على اللى جرالى طبعا كنت مكسوفه
قولتله  : كان فى عيال بيجروا ورائى  
راح قال:  طيب حد عملك حاجه
 انا قولت لنفسى  هقول ازاى ان حد مسك صدرى ازاى !!!
فقولتله : كانوا عايزين يسرقونى
قولت كده وانا مضمره بمعنى الكلمة
حتى لما روحت قولت كده لبابا لانى كان شكلى معيط  وكنت خايفه لما يعرف الحقيقه ميودنيش النادى تانى

بفتكر!! بفتكر ايه اللى حصلى خلانى كده طيب ليه انا كان بيحصلى كده مفيش سبب
بس انا عايزه مخفش تانى عايزه امشى وانا مستريحة
محتاجه احس بالامان انا مش حاسه بالامان   !!

الموقفين دول حصلولى وانا صغيره اوى

فكرهم اكنهم امبارح مش قادره انساهم .. بس كنت دفناهم جوايا
فاكره نظرات الولد وهو بيقولى ( بعد اية ماخلاص ) وفاكره الراجل العجوز اللى اد جدى كان بيلمسنى ازاى
 لازم اكون طبيعيه 
بس اكون طبيعيه ازاى وانا بيحصلى كده لحد دلوقتى ..

 طيب هما الناس مش بيتغيرو ؟
طيب انا مش عارفه اعمل ايه انا لما بركب ميكروباص لحد دلوقتى  بكون خايفه لحد يلمسى
 بتحرك زى المجانين لدرجة ان لو حد فعلا مش هيعمل حاجه بحسسة انى خايفة
 لما بكون ماشيه فى شارع لوحدى ولقى راجل ببعد زى العبيطه  او بمد بسرعه جدا
 بكون خايفه  قلبى بيدق و مش قادره اخد نفسى...
 لدرجة ان اصحابى البنات بيتريقو عليه من كتر ما الموضوع مأثر عليه بشكل كبير
ايوه انا بخاف وانا ماشيه فى الشارع لوحدى
ساعات بتمنى لو القى ولد صديقى ساكن جنبى علشان يوصلنى
لدرجة انى حسيت ان شغلت الرجاله  
اللى اعرفهم  الحمايه واللى معرفهمش التحرش  بس !!

بس دلوقتى انا مش عارفه انا صح انى فكرت نفسى بكل ده !
مش عارفه كنت اسكت وافضل خايفه
طيب ما انا كده كده لسه بخاف من كل ده
 والناس مش هتتغير
مش عارفه !
الحل انى مثلا امشى براجل اكيد مش ده الحل
انا على طول بمشى لوحدى لازم احارب مش هسكت
الحل انى اتكلم واعـــلى صـــــــــوت



بس بجد نفسى اعيش فى امان ..









بكتشف نفســــى



كنت بعرف اكتب وانا صغيره لكن دلوقتى مش بعرف اكتب اللى انا عايزه


لما بكون مضايقه او مبسوطه كنت بطلع الطاقه اللى عندى فى الكتابه دلوقتى بحاول اكتب يمكن ... اعرف نفسى !


انا حاسه انى مش عارفه نفسى ساعات بعمل حاجات مش عايزه اعملها
طول الوقت بعمل حاجات علشان اكتشف نفسى


 عايزه اعرف انا اقدر ولا لا ؟ انا بعرف ولا لا ؟
انا عايزه احس انى ناجحه ..
وانا صغيره كنت فاشله
مكنتش بعرف اذاكر ومحدش كان بيذكرلى ..
 بس كان عندى هدف يمكن مكنتش فاشله يمكن كنت ضعيفه بس دلوقتى 
انا قويه 
 وبحاول افهم نفسى .. 


و بحاول  اكون ناجحه ... 
وكمان طول الوقت بكتشف نفسى .. =)